بۇگىن رەداكسيامىزدىڭ حات قورجىنىنا بەلگىلى سپورت ءجۋرناليسى سەرىك نويانباي ۇلىنىڭ ماقالاسى كەلىپ ءتۇستى. اۆتور كاسىپقوي بوكسشى بەيبىت شۇمەنوۆتىڭ 7 شىلدە كۇنى استانادا وتكىزگەن جەكپە-جەگىنە قاتىستى ويلارىن ورتاعا سالىپتى. «قامشى» پورتالى اشىق پىكىر الاڭى بولعاندىقتان، ماقالانى قاز-قالپىندا جاريالاۋدى ماقۇل كوردىك. وقىرمانداردىڭ ايتارى بولسا، وعان دا سايت بەتىنەن ورىن بەرۋگە دايىنبىز.

Qamshy.kz اقپارات اگەنتتىگى

        بىلەكتى دە جۇرەكتى جىگىتتەرى نامىسقا شاۋىپ، بوز كىلەمدە نەمەسە رينگتە كۇشىن پاش ەتسە جانە جەڭىسكە جەتسە، قازاقتىڭ قانى قىزىپ قيقۋلايدى. باياعى باتىرلارىنىڭ مايدانداعى جەكپە-جەگىن، ۇلىنىڭ سپورتتىق باسەكەدە ب ا ق سىناۋى الماستىرعان بەيبىت زاماندا دا ءبىزدىڭ تىلەۋلەستىگىمىز مەن جانكۇيەرلىگىمىز ەش ورتايماعان. الايدا كەي-كەيدە حالىقتىڭ وسى ىستىق ىقىلاسىن ىسىراپ ەتىپ، دارەجەمدى وسىرسەم دەيتىن كوزبوياۋشىلىقتار دا جوق ەمەس. مىسال رەتىندە 7 شىلدە كۇنى ەلوردا تورىندە رينگتە ويقاستاعان، شاپان كيگەن شوۋمەن-بوكسشىلاردى اتاۋعا بولادى.

 

 

        520 مىڭ دوللار! ءيا، بەيبىت شۇمەنوۆ استانادا تيتۋلدى جەكپە-جەگىن ۇيىمداستىرۋعا وسىنشاما قارجى شىعىنداعان. قازاقستان اۋقىمىندا بۇل اجەپتاۋىر قاراجات بولعانىمەن، الەمدىك دەڭگەيدەگى كاسىپقوي بوكس ءۇشىن تۇككە تۇرمايتىن اقشا. اقش-تا جۇدىرىقتاسىپ ءجۇرىپ، بiر كەشتە بىرنەشە ميلليونداعان پايدا تاباتىن گولوۆكينمەن سالىستىرساڭىز دا جەتكىلىكتى. ەلوردانىڭ 20 جىلدىق تويى قارساڭىندا ەلىمە وسىنداي سىيلىق جاسايمىن دەگەن شۇمەنوۆتىڭ باستاپقى نيەتى قولپاشتاۋعا لايىقتى ەدى. دەگەنمەن، ونىڭ مىرزالىعىنىڭ استارىندا قانداي ماقسات جاتتى؟ بەيبىت بۇل اقشاسىن حالىققا شوۋ ۇسىنامىن دەپ شاشتى ما، الدە جەكە باسىنىڭ جارناماسىنا جاراتتى ما؟ شىمكەنت شاھارىنىڭ بازارلارىن ۋىسىندا ۇستاپ وتىرعان اۋقاتتى اكەسىنىڭ قالتاسىنا 520 مىڭ دوللار اسا سالماق تۇسىرمەسە كەرەك. ۇزاق كۇتكەن وسى بوكس باسكەسىن ءوز كوزىممەن تاماشالاپ قايتقان سوڭ شۇمەنوۆ قىرۋار قاراجاتى جەلگە شاشتى دەگەن قورىتىندىعا كەلدىم.

 

 

          ەڭ ءبىرىنشى سەبەپ – قۇرعاق ۋادە! جاريا ەتىلگەن بىرنەشە جاھاندىق بوكستىڭ تانىمال تۇلعالارى، اتالمىش سپورت دوداسىندا بوي كورسەتپەدى. كۇنى بۇرىن ايگىلى رينگ-انونسەر - مايك باففەردىڭ بۇل كەشتى جۇرگىزەتىنى، بەلگىلى بوكس اڭىزدارى – روبەرتو ديۋران، ەۆاندەر حوليفيلد، حاسيم راحمان مەن حورحە لينارەس، زاب دجۋدالار مەيمان رەتىندە توردەن ورىن الاتىنى ايتىلعان ەدى. 50 cent، Snoop Dogg سىندى اقش-تىڭ ونەر جۇلدىزدارى دا كەلىپ ءان شىرقاۋى ءتيىس بولاتىن. الايدا 7 شىلدەدە «بارىس ارەناعا» جيىلعان جۇرت جوعارىدا اتالعان ايتۋلىلاردىڭ بىردە-بىرىن كورە المادى. مۇمكىن شۇمەنوۆ كومانداسىنىڭ اقشاسى جەتپەي قالعان بولار؟! ءبىراق بەيبىت ەلدىڭ الدىندا بەرگەن سوزىندە تۇرۋعا تىرىسقان بولسا، بىرەۋىنىڭ قالاماقىسىن ۇستەمەلەي تولەسە دە، قازاقستانعا كەلتىرەتىن قاۋقارى بار ەدى. جالپى، تالاي كونسەرتتەر مەن وزگە دە شارالاردا ايتىلعان ادامنىڭ كەلمەي قالۋىنا جەرلەستەرىمىز ءجيى كۋا بولىپ ءجۇر.

 

 

       مىنا قىزىققا قاراڭىز... شۇمەنوۆتىڭ رينگتەگى كەزدەسۋىنە ساناۋلى كۇندەر قالعانعا دەيىن الگى تىزىمدەگى VIP قوناقتاردىڭ استاناعا كەلەتىنى جايلى بەدەلدى اقپاراتتىق-سپورتتىق سايتتار جارىسا جازدى. حالىق تا بۇل جارناماعا يمانىنداي سەنگەنى انىق. جۇلدىزدار كوشى ۋادەلى ساتتە كورىنبەگەن سوڭ شۇمەنوۆتىڭ جانكۇيەرلەرى الەۋمەتتىك جەلىدە ولارعا سۇراۋ دا سالعان. الايدا ۇيىمداستىرۋشى تاراپ مارتەبەلى مەيمانداردىڭ شاقىرتۋدان نەگە باس تارتقانى جايلى ەش رەسمي مالىمدەمە جاساعان جوق. بۇدان تۋىندايتىن پايىم بىرەۋ عانا. شۇمەنوۆتىڭ تيتۋلدى جەكپە-جەگىن وتكىزۋگە مۇرىندىق بولعاندار اتالمىش بوكس كەشىن بارىنشا جارنامالاپ قالۋ جولىندا وسىنداي ارزان ايلانى جۇزەگە اسىرعان. اتاقتى تۇلعالاردىڭ ەسىمىن پايدالانىپ، ەلدى ەلەڭ ەتكىزۋ ءۇشىن مۇنداي قۇيتىرقى ماركەتينگتىك ءادىستى قولدانۋ قاشان دا ءتيىمدى. دارقان كوڭىلدى قازاق بۇل ولقىلىقتارعا دا كوز جۇمىپ، ەرتەڭ-اق ۇمىتادى دەپ ويلاسا كەرەك شۇمەنوۆتىڭ كومانداسى. ءبىراق سۋدىڭ سۇراۋى بار ەكەنىن ولار ەستەن شىعارماۋى ءتيىس! كوتەرە المايتىن شوقپاردى بەلگە بايلاۋدىڭ قاجەتى جوق ەدى. جاھاندىق دەڭگەيدەگى بوكس كەشىن ۇسىنامىن دەپ جار سالساڭ، سوعان لايىق بول! سەنىڭ مەرەيىڭدى ۇستەم ەتىپ، شاشباۋىڭدى كوتەرىپ جۇرگەن وسى حالىق. «ايداعانى بەس ەشكى، ءبىراق ىسقىرىعى جەر جاراتىن» مۇنداي سپورتتىق يۆەنتتى ۇيىمداستىرۋشىلاردىڭ بۇگىنگى نارىقتا عۇمىرى ۇزاق بولمايدى.

 

 

 

 

       ادىلدىگىن ايتۋ كەرەك. شۇمەنوۆ - قوس سالماق دارەجەسىندە الەم چەمپيونى اتانعان قازاقستانداعى جالعىز بوكسشى. مانسابىنداعى ەكى جىلدىق ۇزىلىستەن سوڭ بىردەن WBA تۇجىرىمىنىڭ ۋاقىتشا بەلبەۋى ءۇشىن ايقاسقا شىعۋ جانە ونى جەڭىپ الۋ وڭاي شارۋا ەمەس. بەيبىت بۇعان دەيىن التى جەكپە-جەگىن قازاقستاندا، ياعني بىرەۋىن استانادا، قالعان بەسەۋىن شىمكەنتتە وتكىزىپتى. سوڭعى رەت 2011 جىلى تۋعان جەرىندە رينگكە كوتەرىلگەن قانداسىمىز اركەز ازۋلى بوكسشىنىڭ ءبىرى سانالعان. ونىڭ سپورتتىق دارەجەسىنە باعا بەرەتىن دە – تەك حالىق.

 

 

      كاسىپقوي بوكستاعى باعىندىرعان بيىگى ءبىرشاما بولسا دا، شۇمەنوۆ ەلىمىزدە اسا بەلگىلى ەمەس. سەبەبى ول اۋەل باستان اقش-تىڭ سپورتتىق اۋديتورياسىنا ءوزىن تانىتۋ جولىندا تەر توكتى. ءبىرشاما جىل سول مەملەكەتتە تۇرىپ تا كوردى. جاراقاتتارى جيىلەپ، جاسى دا كەلىپ قالعان شاقتا قازاقستانعا ورالعان وتانداسىمىز قانات يسلام سەكىلدى بوكسشىلارمەن سالىستىرعاندا ابىرويىنىڭ الاسا ەكەنىن ۇققانداي ەدى. بۇل – كەز كەلگەن نامىسقوي سپورتشىنىڭ شامىنا تيەتىن فاكتور. شۇمەنوۆ سەكىلدى ايگىلى تۇجىرىمداردىڭ چەمپيوندىق بەلبەۋلەرىن تاعىنباسا دا، قانات يسلام الماتى مەن استانادا قوس بىردەي بوكس شوۋىن ۇيىمداستىرىپ، جانكۇيەرلەرىن مولىنان جيناي بىلگەن بولاتىن. تۋرا سول 12 000 ادامعا لايىقتالعان «بارىس ارەنادا» 7 شىلدە كۇنى رينگكە شىققان بەيبىت بولسا سپورت كەشەنىنىڭ ۇشتەن ءبىر بولىگىن جۇرتقا ارەڭ تولتىردى. 120 مەملەكەتكە تىكەلەي ەفيردە تاراتىلعان تيتۋلدى جەكپە-جەك كەشى ءۇشىن بۇل – وتە ناشار كورسەتكىش. ەلوردانىڭ 20 جىلدىعىن تويلانعان تۇستا استانادا قىدىرعان حالىق تا كوپ بولاتىن. دەگەنمەن نەلىكتەن ەشكىم كەلمەدى؟ ۇيىمداستىرۋشىلار جىبەرگەن باستى قاتەلىك – اتالمىش بوكس دوداسىندا شۇمەنوۆتەن وزگە ەلگە ەسىمدەرى ءمالىم قازاقستاندىق بىلعارى قولعاپ شەبەرلەرىنىڭ جۇدىرىقتاسپاۋى. مىسالى، باتىر جۇكەمبايەۆ، ابىلايحان قۇسايىنوۆ، جانقوش تۇراروۆ، سادريددين احمەدوۆ سەكىلدى ءوز فاناتتارى بار جىگىتتەرگە لايىقتى ۇسىنىس جاسالسا، ولار باس تارتپاس ەدى. باستاپقىدا بۇل اتالعان بوكسشىلار دا، 7 شىلدەدە شۇمەنوۆپەن قاتار رينگكە شىعادى دەگەن اقپارات تا تارادى. تەك تاعى دا ءسوز جۇزىندە! «بارىس ارەنادا» وتكەن جەكپە-جەك كەشىنە قاتىسۋعا تىلەك بىلدىرگەن جەرلەستەرىنە شۇمەنوۆ كومانداسى «قارسىلاستى ءوزىڭ تاباسىڭ جانە بار شىعىنىن موينىڭا الاسىڭ» دەگەن تالاپ قويعان كورىنەدى. سول سەبەپتى ناعىز بوكس مايدانىن كورسەتە بىلەتىندەردىڭ ورنىن ءوز ءلاززاتىنا توبەلەسىپ جۇرگەن ءانشى يبراگيم ەسكەندىر سەكىلدىلەر باستى. ولار 1-2 مىڭ دوللار ءۇشىن باسەكەگە شىعۋعا دايىن، ەشكىم تانىمايتىن ورتاڭقول سپورتشىلاردى اكەلىپ، العاشقى راۋندتاردا-اق جايپاپ سالدى.

 

 

 

 

     تۋعان جەرىندە جەڭىستىڭ تۋىن كوتەرىپ، مەرەيى ۇستەم ەتۋدەن كىم ات-تونىن الا قاشسىن؟! شۇمەنوۆ كومانداسىنىڭ تاعى ءبىر سۇرىنگەن تۇسى - بوكس كەشىنىڭ فايت-كاردىن (جەكپە-جەكتەر ءتىزىمىن) جاساقتاۋدا جاڭىلىس باسۋى. قازاق بوكسشىلارىنىڭ بۇل كەشتەگى باسىمدىعىنىڭ بار سىرى - ءالسىز قارسىلاستارى ەدى. شۇمەنوۆتى ەسەپكە الماعاندا، ەلگە ۇسىنىلعان 10 جەكپە-جەكتىڭ باسىم كوپشىلىگىندە بوكسشىلارىمىز ءازىربايجان، گرۋزيا مەن رەسەي سەكىلدى ءۇش-اق ەلدەن كەلگەن «قاڭباق قارسىلاستاردى» قالپاقپەن ۇرىپ الدى. تيسىنىشە، سول كۇنگى جەكپە-جەكتەردىڭ ءبىرازى تارتىسسىز ءارى تارتىمسىز ءوتتى! اتالمىش كەشتە تۇركيانىڭ نامىسىن جىرتىپ كەلگەن حيزني التۋنكايا عانا، باستى ايقاستا بەيبىت باۋىرىمىزدى 9-راۋندقا دەيىن ءبىراز قارا تەرگە ءتۇسىردى. ايتەۋىر بىزدىكىلەر شىقاننىن شەتىنەن قىرادى، ۇرعانىن قۇلاتادى! ءبىراق، نەكە ەكەنىن قايدام، گولوۆكين، شۇمەنوۆ پەن جاقيانوۆ سەكىلدى چەمپيوندارىمىز ازىرگە از...

 

 

   ەۋروپانىڭ، اقش پەن لاتىن امەريكاسىنىڭ ءتاۋىر سپورتشىلارىن استاناعا شاقىرتىپ، جارناماسى جەر جارعان بوكس كەشىنىڭ گەوگرافيالىق اۋقىمىن كەڭەيتۋگە بولمادى ما دەگەن زاڭدى سۇراق تا تۋىندايدى. ۇيىمداستىرۋشىلار ءبارىن قۋ اقشاعا تىرەيتىنى دە تۇسىنىكتى... دەگەنمەن شۇمەنوۆ شاشقان 520 مىڭ دوللاردان جىگىتتەرىمىزگە لايىقتى بىرنەشە قارسىلاسقا ءناپاقا بۇيىرماعانىنا سەنۋ دە قيىن. بۇل بوكس دوداسىنا شىققان قازاق بوكسشىلارىنىڭ ىشىنەن ءالى جەڭىلىس ءدامىن تاتپاعان، كاسىپقوي رينگتە ەندى قانات جايىپ ءوسىپ كەلە جاتقان ايدوس ەربوسىن ۇلى، ءۋاليحان بيسەنقۇلوۆ پەن بابىرجان مومىنوۆتاردى اتاپ وتۋگە بولادى. ولارعا ەندى شۇمەنوۆتىڭ اندەركاردى سەكىلدى تەگىن توبەلەس الاڭداردان گورى شەتەلدىك ارەنالارعا ءجيى شىعۋعا ۇمتىلۋ قاجەت. ءىس جۇزىندە «بارىس ارەناعا» شۇمەنوۆتىڭ شوۋى 3500-4000 ادامدى ارەڭ جيناي الدى. سپورتتىق سايتتارىنا شىققان اقىلى ماداق ماتەريالدار قانشا كوپ بولسا دا، اتالمىش بوكس كەشىنىڭ كەمشىن تۇستارىن جاسىرا المايتىنى بەلگىلى.

 

 

سالىستىرمالى تۇردە قانات يسلام باستى جەك-جەككە شىققان ەكى بىردەي بوكس كەشىنىڭ دە تابىستى بولۋىنىڭ بىرنەشە سەبەپتەرى بار. بىرىنشىدەن ول - ساۋاتتى ءارى ءتيىمدى ۇيىمداستىرىلعان جارنامالىق كومپانيا. ەكىنشىدەن وزىندىك ستيلىمەن تانىمال، سپورتشى رەتىندە اتاعى قالىپتاسقان جانىبەك ءالىمحان ۇلى، جانقوش تۇراروۆ، ايدار شارىبايەۆ، ءالي احمەدوۆ، مەيىرىم نۇرسۇلتانوۆ، ايدوس ەربوسىن ۇلى سىندى جاس بوكسشىلاردىڭ رينگتە ونەر كورسەتۋى. بۇل تالانتتى بىلعارى قولعاپ شەبەرلەرىنىڭ قارسىلاستارى دا وسال بولمادى. ءبىزدىڭ كوزى اشىق جانكۇيەردى بۇگىندە الدىندا كەلگەننىڭ ءبارىن قيراتىپ، العاشقى مينۋتتاردا-اق سۇلاتىپ سالاتىن سۋپەرمەندەرمەن الداي المايسىڭ.

 

 

 

 

   بريتاندىق BOX Nation تەلەارناسى 120 مەملەكەتكە كوگىلدىر ەكران ارقىلى تاراتقان شۇمەنوۆتىڭ بوكس شوۋىن شىمكەنتتەگى ۇلان-اسىر تويعا ۇقساتتىم. ەركە ەسماحان، ءقىدىرالى بولمانوۆ سەكىلدى قاپتاعان ونەر جۇلدىزدارى ەكى جەكپە-جەك سايىن 4-5 كومپوزيسيادان قاتار ورىنداپ، جۇرتتى مەزى ەتكەنى بار. قازاقشا پاتريوتتىق رۋحتاعى تۋىندىلارعا رەپەتۋارى جۇتاڭ انشىلەرمىز، امال جوق، ماحاببات جايلى شىرقاپ بەردى. قۋاندىق راقىم مەن «الاش ۇلى» توبىن شاقىرىپ-اق 4-5 انمەن وتىرعان جانكۇيەر جۇرتتىڭ قانىن قىزدىرۋعا بولار ەدى. الىپ LED ەكراندارمەن بەزەندىرىلگەن سول كەشتىڭ ساحناسى ادەمى بولعانىمەن، الگى انشىلەر مۇلدە ۇيلەسپەدى. كاسىبي سەناريي جازىلماعان، كاسىپقوي رەجيسسەر ىسكە ارالاسپاعان! بىلعارى قولعاپ شەبەرلەرىنىڭ رينگكە بەتتەگەن ءساتىن، كەرەمەت تەاترلاندىرىلعان قويىلىم ەتىپ شىعارسا نەسى ايىپ؟! شاپان كيگەن شوۋمەندەرىمىز بارىنشا تىراشتانىپ جاتقان شاقتا، شەتەلدىك بوكسشىلار باستان-اياق تەك ءبىر مۋزىكانىڭ سۇيەمەلدەۋىمەن رينگكە شىقتى. «بارىس ارەناداعى» زاماناۋي جارىق قوندىرعىلارىنىڭ بار الۋەتىن باسقارۋ تەتىگىندە وتىرعان مامان دا پايدالانىپ جارىتپادى. VIP اۋماقتاعى مازاسىز جۇرتتى تاپجىلتپاي وتىرعىزىپ، تويدا جۇرگەندەي ەركىنسىپ كەتكەندەرىن ىرقىنا كوندىرەتىن تالاپشىل كۇزەتشىلەر توبى دا بايقالمادى. ب ا ق وكىلدەرى سپورت كەشەنىنە تىزىممەن كىردى، ءبىراق ەشبىرىنە ارنايى توسبەلگى (اككرەديتاسيا) بەرىلمەگەن. كىمنىڭ كىم ەكەنىن ۇقپايسىڭ! جولىڭدى كەسىپ، قاۋىپسىزدىك ماقساتىندا تەكسەرىپ جاتقان ەشبىرى جوق.

 

 

 

 

    بوكس دوداسىنىڭ باستالۋىن تۇسكى 13:00-گە قويعان ۇيىمداستىرۋشىلار تىكەلەي ەفيرىن بەرگەن بريتاندىق BOX Nation تەلەارناسىنىڭ ەۋروپالىق كەستەسىنە كوندىككەن ەكەن. ءبىز ءۇشىن ۇتىمسىزداۋ ۋاقىت. قازاقستاندىق تەلەكورەرمەن مەن باسەكەنى تاماشالاۋعا كەلگەن جۇرتىڭ مۇددەسى ەسكەرىلمەگەن! قاراپايىم تريبۋناعا كىرۋ قۇنى 2000 تەڭگەدەن باستالسا، VIP اۋماقتاعى بيلەتتەر 30 000 تەڭگەگە دەيىن ساتىلعان. الايدا رينگتىڭ اينالاسىنداعى ورىندىقتاردا ەشبىر رەتتىك ءنومىر جوق، ۇلگەرىپ كەلگەن مەيمان ءبىرىنشى بولىپ وتىرىپ جاتىر. بەي-بەرەكەت سابىلىپ جۇرگەن ادامدار! مۇنداي سپورتتىق شارالاردا، ادەتتە الدىڭعا شەپكە ەلگە ەلەۋلى ازاماتتار جايعاسادى. سول ءداستۇر بويىنشا، ارنايى شاقىرتۋمەن كەلگەن سەرىك ساپييەۆ، باقتيار ارتايەۆ، باتىر جۇكەمبايەۆ سەكىلدى تانىمال سپورتشىلار ءبىرىنشى قاتاردا وتىرعان ەدى. بوكس كەشىنىڭ ورتا تۇسىندا ۇيىمداستىرۋشىلار ولاردان ورىندارىن بوساتۋدى سۇرادى. سەبەبى ءبىر توپ ەل اعالارى سول جەرگە كەلىپ جايعاسۋى ءتيىس ەكەن. مۇنى ەستىگەن مىنەزدى سەرىك ساپييەۆ اشۋعا بۋلىعىپ، VIP قوناقتاردى جايعاستىرىپ جۇرگەن جىگىتكە ەشقايدا تۇرمايتىنىن ايتتى. شىققان شۋدى ۋشىقتىرعىسى كەلمەگەن ول تىكەلەي ترانسلياسيا ءجۇرىپ جاتسا دا، ساپييەۆ پەن ارتايەۆتىڭ ءدال الدىنان الگى لاۋازىمدى كىسىلەرگە ارناپ، تاعى ءبىر قاتار ورىندىقتاردى اكەلىپ ءتىزدى. شۇمەنوۆتىڭ ءوزى مارتەبەلى قوناعىم دەپ شاقىرتقان كاسىپقوي بوكسشى جانات جاقيانوۆ تا ءدال جاڭاعىنداي «قۋدالاۋعا» ۇشىرادى. تەمىردەي ءتارتىپ پەن جۇيەلى جوسپار بولسا، مۇنداي بەي-بەرەكەت ءتىپتى بولماس ەدى عوي.

 

 

   شۇمەنوۆ 7 شىلدە كۇنى ءوزى ۇتىپ العان WBA Regular بەلبەۋى ءۇشىن اتالمىش تۇجىرىمعا ءبىرشاما اقشا تولەدى. سەبەبى تيتۋلدى جەكپە-جەك وتكىزۋ ءۇشىن بوكسشىنىڭ پروموۋتەرى تيەسىلى ۇيىمعا جانە جەرگىلىكتى فەدەراسياعا قارجى قۇيادى. بۇل – جاھاندىق بوكستىڭ بۇلجىماس ءداستۇرى. جانە شۇمەنوۆ ءبىر وقپەن ەكى قوياندى اتىپ الماق بولىپ، استانادا WBAء-دىڭ (بۇكىلالەمدىك بوكس قاۋىمداستىعىنىڭ) كونۆەنسياسىن وتكىزۋگە قول جەتكىزدى. وسىلايشا WBA پرەزيدەنتى جيلبەرتو حەسۋس مەندوس پەن حوسە وليۆەرا باستاعان ءبىر توپ لاۋازىمدى جانداردىڭ ەلورداعا تابانى تيگەن ەدى. شۇمەنوۆتىڭ جەكپە-جەگىنەن سوڭ WBA وكىلدەرى استانا اكىمى اسەت يسەكەشيەۆپەن دە جۇزدەسكەن. دەگەنمەن كونۆەنسيانىڭ قاي جەردە جانە قاشان وتكەنى جايلى ب ا ق بەتتەرىندە جارىتىپ ەشتەڭە جازىلمادى. بوكس كەشىن ۇيىمداستىرۋعا قارجىلاي جاردەمدەسكەن استانا اكىمدىگىن شۇمەنوۆتىڭ كومانداسى WBA باسشىلارىمەن داستارقانداس ەتىپ، كوڭىلىن اۋلاعان سەكىلدى. سونىمەن قاتار شۇمەنوۆ حالىقارالىق دارەجەدەگى تانىمال رەفەري توني ۋيكس پەن بەلگىلى وليمپيادالىق رينگ-انونسەر مايك ماركحامعا دا قالاماقىسىن اياماي تولەگەن.

 

 

    الەمدىك دەڭگەيدەگى سپورتتىق شارالار – مەملەكەتتىڭ ساياسي جانە قوعامدىق تىنىس-تىرشىلىگى ءۇشىن اۋاداي قاجەت قۇرالدىڭ ءبىرى. بۇل قۇرال قانداي ونەرپازدىڭ قولىنا تيسە، سونىڭ ماقامىندا سويلەيدى. شۇمەنوۆتىڭ تيتۋلدى جەكپە-جەگىن انشىلەردىڭ ەل الدىنداعى ەسەپ بەرۋ كەشى سەكىلدى دەۋگە بولادى. ونى لايىقتى ەتىپ وتكىزۋ جانە جانكۇيەردى شوۋمەن رازى ەتۋ - ۇيىمداستىرۋشىعا پارىز. سەبەبى سول نارىقتىڭ وكىلدەرى ءوز سالىعىنىڭ اقشاسىنا سپورت سارايلارىن سالدىردى جانە ەرتەڭ بيلەتىڭدى دە ساتىپ الاتىن – سولار. حالىقپەن ساناسپاۋ، جەكە باسىڭنىڭ قامى ءۇشىن ونى الداۋعا تىرىسۋ – قىلمىس!

 

 

       شۇمەنوۆ ءوز ابىرويىن اسىرعان ەلىنىڭ الدىندا سپورتشى رەتىندە قارىزدار ەدى. وسۋىنە تىلەۋلەس بولىپ، ءار جەڭىسىنە قۋانعان جۇرتى ءۇشىن شۇمەنوۆ تە ءبىر شاشىلىپ، سپورت دوداسىن تارتۋ ەتكىسى كەلگەن بولار... بۇل نيەتى راس بولسا، ول قوشەمەتكە لايىقتى! اقيقاتىندا ول قارجىسىن جەكە باسىنىڭ جانە ءوزىنىڭ پروموۋتەرلىك كومپانياسىنىڭ جارناماسى ءۇشىن جۇمسادى دەۋگە بولادى! سەبەبى ۇزاق ۇزىلىستەن سوڭ قايتا ورالعان شۇمەنوۆ ەندى كاسىپقوي رينگتە ءارى كەتسە 3-4 جەكپە-جەك وتكىزىپ ۇلگەرەر. ءبىتتى! ونىڭ كەلەشەكتەگى ماقساتى - قازاقستاندىق بوكسشىلاردىڭ اقش نارىعىنا كىرۋىنە جانە وسۋىنە جاردەمدەسىپ، اقشا تابۋ. ءوزىن پروموۋتەر ءارى سپورت مەنەدجەرى رەتىندە تانىتىپ تا ءجۇر. سوندىقتان دا شۇمەنوۆ ءدۇيىم ەلگە ءدۇبىرىن ەستىرتىپ جەكپە-جەك جاساۋ ارقىلى، پايدا كەنەلۋدى ويلاعان جوق، كەرىسىنشە ەرتەڭگى بيزنەس-جوسپارىنا ينۆەستيسيا قۇيدى!